Dorvvastuvvon – gorudiid ja sajiid politihka

Dorvvastuvvon – gorudiid ja sajiid politihka

Vantaa dáiddamusea Artsi čavčča vuosttaš čájáhus gieđahallá dorvvolašvuođa sierra beliid almmolaš ja priváhta sajiin ja máilmmipolitihkas. Čájáhus joatká servodatlaš čájáhusaid ráiddu ja lea ollašuhtton ovttasbarggus Frame Contemporary Art Finland Vieraanvaraisuusharjoituksia-prográmmain. Dorvvastuvvon – gorudiid ja sajiid politihka -čájáhus lea oaidninláhkái Myyrmäkis 9.9.–24.10.2021.

Čájáhusa dáiddárat leat Panos Balomenos, Forensic Architecture, Elis Hannikainen & Vappu Jalonen, Flo Kasearu, Kristina Norman, Sepideh Rahaa, Annika Rauhala, Shubhangi Singh ja Hito Steyerl. 

Dorvvolašvuohta lea okta olbmo vuođđodárbbuin, muhto mo dorvu ráhkaduvvo ja doalahuvvo? Geat suodjaluvvojit ja mas dahje geas? Dorvvastuvvon – gorudiid ja sajiid politihka -čájáhus beassá sisa dorvvolašvuođa máŋggaolat duođalašvuhtii. Dáiddaduojit dárkkodit dorvvolašvuođa ja dorvvolašvuođapolitihka servodaga almmolaš ja priváhta sajiin. Dat dárkkodit maiddái museaid čájáhussajiid. Čájáhussii oassálasti dáiddáriid iešguđetlágán lahkonanvuogit hástet ja ođđasit árvvoštallet dorvvu ja dorvvolašvuođa dárbbuid ja eavttuid.

Servodatlaš, kultuvrralaš ja ekonomalaš ráhkadusat sáhttet dahkat vejolažžan ovttaskas olbmuid, ja dávjá olgguštuvvon vehádagaid vásihan veahkaválddi, sihke almmolaš sajis ja ruovttus. Dorvvastuvvon – gorudiid ja sajiid politihka buktá ovdan dáiddalaš barggu mearkkašumi dán fáttá guorahallamis. Dáidda veahkeha min dárkkodit ja hástit dorvvolašvuhtii laktáseaddji ráhkaduslaš botnjašumiid riektevuogádagas ja árgga kultuvrras.

Dorvvolašvuođa dovdu ja veahkaválddi uhki leat persovnnalaš, báikkálaš ja gorutlaš vásihusat, muhto daid duogážis leat áššit, maid gaskkas leat ovttalágánvuođat ja oktavuođat eatnandieđalaš ja kultuvrralaš sajiid gaskkas. Čájáhus ovdanbuktá dáid oktavuođaid. Dáiddadujiid gaskii šaddet narratiivvat, main čájáhusa jearaldagaid sáhttá guorahallat gitta Myyrmäkis Mubai rádjai, St. Petesburgis Kiovii ja Kurdistanis Ateenai.

Musea instituhttan lea oassi riikkaidgaskasaš oktavuođaid ja válderáhkadusaid. Dorvvolašvuohtajurddašeapmi museain laktojuvvo dávjá dáiddadávviriid ja čoakkáldagaid dorvvolašvuhtii ja museadálu suodjaleapmái. Mii jearrat sáhttágo musea fállat dorvvu ja suoji iešguđetlágán servošiidda ja ovttaskas olbmuide, geat galledit doppe. Gii vásiha musea ja dan válderáhkadusaid dorvvolažžan?

Dorvvastuvvon – gorudiid ja sajiid politihka -čájáhusa leat kurateren Frame Contemporary Art Finlandin prográmmahoavda Jussi Koitela ja Vantaa dáiddamusea Artsi čoakkáldatamanueansa Christine Langinauer.